一部戲之所以成功，除咗主角要好戲之外，周邊啲演員都好重要，假如是但一邊都交唔到戲，劇本同製作點都好係嘥氣！

但係好多製作人經常慣性忽視呢啲俗稱做「茄喱啡」嘅臨時演員，無論喺待遇同對佢哋都態度，得唔到尊重係平常不過嘅事，酬勞分分鐘比唔上一個洗碗女工，唯一令呢班人繼續做，十居其九都係因為鍾意做戲！

噚日喺fb有一個叫謝汶希嘅女仔，貼咗兩張濕身兼濕鞋嘅相，之後再爆seed留言話：「今日ViuTV拍攝，無事先交代濕身，而且劇組仲唔識操控條水喉，導致支消防喉對住成班臨時演員噴！仲數次大聲喝住我哋唔俾向後退！仲有嘅係全部都係自己衫！濕到滴晒水！把傘仲係小童傘，拍咗起碼20 takes以上！

「事後補得30蚊當掩口費（濕身錢）！老實講，臨時都係人，今晚全部人有嘅係學生，有啲係有正職，得閒過來玩下，或者賺下零用錢！下午3點半玩到凌晨兩點幾，依家全部都要濕住個身返屋企。如果身為臨時演員嘅你仲有少少底線及良知或尊嚴，麻煩支持轉發！我哋係人！我哋都係演員！我哋都有爹娘生！我哋需要得到應有嘅尊重！！PS：對鞋係有水嘅！就咁樣由觀塘返大埔！」謝汶希又稱，帶隊嗰個人聲稱不知要濕身，仲話以後都唔會再幫呢間公司啲人拍嘢。