范冰冰最近都相當惹是非，早排佢被央視前主播崔永元爆料，指佢疑做「陰陽合同」暪稅，今日大陸網又瘋傳疑似范冰冰同一男子親熱照。

范冰冰工作室今日下午發出嚴正聲明，話網上平台散播呢啲「疑似范冰冰親密照爆光」、「范冰冰和XXX」等不實言論，並予以配圖，嚴重侵犯范冰冰名譽，所以工作室作出聲明，話相關圖片同言論均是人為惡意捏造，圖片中並非范冰冰本人。

聲明中譴責相關謠言炮製者，要求網絡用戶、新聞媒體等立即刪除同停止轉發謠言，與此同時又表示已委託律師調查同取証，及會依法追究未及時刪除相關謠言發佈者及轉載者的法律責任。工作室又配咗圖片，用作證明范冰冰同親密照中女子手指同耳垂不同之處。原來呢啲相係愛奇藝節目《天使狙擊隊》嘅劇照，節目主持人今日都有喺微博澄清。

另外，范冰冰同葛優主演嘅電影《手機2》現場開工相今日爆光，有大陸傳媒日前影到范冰冰同葛優喺北京開工，葛優戴住假髮同范冰冰密密斟，而導演馮小剛就好緊張咁喺現場指揮。

精選娛聞，喺晒《娛果》
http://fb.com/appledailyent