民記「元秋」蔣麗芸早前立法會宣誓就職時搞搞新意思，用普通話宣誓，事後仲喺facebook出post認叻，點知𠵱家就俾長洲「覆核王」郭卓堅拎住佢發音唔正提司法覆核，元秋竟然學小學雞網民咁，低調改post，以為咁就代表冇發生過！
話說元秋原本個post寫明，「雖然練習了多次，看來發音仍未達標，請大家賜教」，原來佢喺宣誓後兩日、即建制派開始鬧香港眾志羅冠聰讀歪音宣誓時，就低調地將原本個post改咗，將承認自己普通話將「未達標」內容刪去，變成「因為很多朋友認同我的普通話說得很好，在這莊嚴場合值得用普通話宣誓」！

編輯紀錄原形畢露

有人質疑元秋係咪知咁寫會瀨嘢，所以先偷偷地改咗嗰幾句文，以為可以當冇寫過。不過元秋似乎唔知facebook有樣嘢叫「編輯紀錄」，只要㩒一個掣，就睇到元秋於10月15日編緝咗原先個post！八方噚日問元秋為乜無端端要改post？佢就話自己當初喺facebook咁講，完全係出於「謙虛」，後來有朋友話佢咁寫法，可能會俾人話佢連宣誓都講錯，所以就決定事後改post，仲講笑話以後都係唔好咁謙虛嘞！

李八方
mailto:[email protected]