【ATV告急之論功行賞】二月糧尚未出，白武士又未出現，為了撲水一班亞視高層奇招盡出，安排員工借糧，搵藝員做騷籌款出糧給自己，荒謬的事似乎都盡在亞視。昨日本報收到自稱小員工的報料投訴指亞視無糧出仲有人升職，趙汝強何得何能，亞視荒謬至極。
本報向亞視發言人查詢「亞視無糧出仲有人升職」一事，亞視發言人表示此乃公司正常人事委任，現正是公司艱難時期，所以薪金不會調整，之後不會有人升職，對於有關製作部副總裁趙汝強的指摘，這方面亞視不作評論。獲晉升的六名高層包括趙汝強、陳興昌、梁小蕙、李正剛、彭婉華及黃守東（詳見附表），當中有三名曾於去年除夕記者會上呼籲亞視員工留低迎難而上「維穩」，結果得到擢升機會。
葉家寶昨日在其博客表示：「我評估現時的情況，如果一切順利，幾筆收入可於明天到帳的話，二月份的員工薪金將可於後天（六日）向所有同事們發放。對於今次我們未能於二月底發放薪金，我要再次向所有同事說聲對不起，也感謝大家與我並肩，為公司的存亡堅守。」

蔡國威：奇聞

一眾藝員對高層升職不加薪議論紛紛，蔡國威笑笑口說：「可能係論功行賞，或者佢哋私底下有調整呢唔知，普遍升職一定有加薪喇！」升職無薪加會不會是一個笑話？他笑說：「大家喺度笑緊喇！只不過呢個都係喜事，都算係一個奇聞，我哋成日講亞洲電視係冇嘢冇可能！亞洲電視好有創意！」張家瑩表示升職對她無影響，她說：「我都搞唔清楚，喺呢個時候點解突然間有呢個決定！有時薪水同職位唔係成正比，可能做嘢方面會方便佢。」
採訪：舒娜