由韓劇《我係金三珣》女星金宣兒夥拍甘宇成主演嘅SBS新劇《能先接吻嗎》，噚晚播出第19、20集，港劇迷可於Viu同步追看。

承接上集劇情，甘宇成同金宣兒終於結咗婚，婚後兩人就度蜜月，但兩人就不時為小時嘈交，而甘宇成因為患癌關係，所以佢想一切盡善盡美，因為佢覺得今次係第一次旅行，亦都係最後一次旅行。而喺旅途上，金宣兒喺休息站時誤上錯年青人嘅車，甘宇成見到金宣兒同對方有傾有講，醋意大發。

甘宇成一心同金宣兒睇星星，點知導航卻去錯地方，令金宣兒大感無奈，但甘宇成堅持要睇星星，最後佢哋終於到達目的地天文台，但又遇上休館，甘宇成只好低調地向職員自爆自己患咗末期癌症，只剩一個月命，求職員畀佢可以入館睇，最終兩人度過咗浪漫一夜。

金宣兒嘅前夫吳智昊一直對金宣兒再婚太感傷心，其現任妻子朴詩妍得知甘宇成患癌真實，一直掙扎應唔應該話畀吳智昊聽，最終佢亦決定講出事實，吳智昊打電話質問甘宇成，甘宇成表示自己會快樂地活下去。而晚上，甘宇成喺上山嘅路上暈倒兼跌落山，金宣兒轉頭一看已唔見甘宇成，到通話接通後才得知甘宇成已被送往醫院。

結尾甘宇成想起八年前同金宣兒第三次見面嘅畫面，原來當時甘宇成唔肯為金宣兒嘅孩子死亡事件作證，金宣兒去到甘宇成嘅公司請求對方，但甘宇成唔肯見面，當時正下着大雨，甘宇成睇見狼狽不堪嘅金宣兒，甘宇成卻未有伸出援手......

噚晚《能先接吻嗎》兩集收視分別係9.5%及11.9%，繼續穩坐同時段收視冠軍，而由金所炫同尹斗俊主演嘅KBS嘅《Radio Romance》，噚日大結局有3.1%收視，成功洗甩包尾，進佔同檔第二位；而MBC嘅《偉大的誘惑者》播出第7及第8集，分別有2.5%、2.3%收視，包尾墊底。

更多韓流，喺晒《娛果》
http://fb.com/appledailyent