廣州市嘅沙士疑案，終於確定，病患者叫做羅堅，今次證實係堅，真係中咗沙士，重有一個女人，喺野味舖開工，亦可能中埋招！
鐘南山即刻話，贊成當局殺晒所有嘅果子狸！咁樣，就即是再犯殺業。果子狸係野生動物，同廣州人本來無怨無仇，係廣東省嘅飲食奸商，狂捕濫殺，捉咗之後又自己養，破壞自然生態，於是遭到上天報復。果子狸無辜，係廣東人有罪；野生動物純真，係珠江三角洲呢個地區血腥野蠻！

以民為本只得把口
就正如一個特首，若然七年來搞垮香港，要追究，就應該追究當初邊個養大佢，係邊個最初欽點佢，將佢擺入嚟香港呢個生態市場。將個特首拉去打靶都冇用，佢本性就係咁，問題係邊個將佢由森林大自然引進城市，猛咁話係補品。
廣東省去年爆發沙士，中央政府都經已下令禁食野生動物，但廣東省政府並無真心打擊，上頭亦三分鐘熱度。人命關天，死幾多平民百姓，呢個政府唔會關心。法輪功又唔同，如果中國政府肯以打擊法輪功嘅組織力嚟禁止屠宰野生動物，又點會沙士重臨？憑呢一點，就知道所謂胡溫新政，號稱以民為本，都重係得把口。
特區政府出動三大醫療巨頭，包括今年三月沙士有責在身、尚未追究嘅楊永強，面懵懵咁出嚟解畫。上一次沙士，楊永強疏忽職守，三百條人命，至今重有得撈緊，未曾執包袱走。楊局長呢隻「問責沙士」都尚未斷根，真正嘅病毒沙士梗係會番轉頭，啲沙士病毒見到靚仔強，都會覺得熟口熟面，如果病毒有性，都會笑騎騎咁指住儍強咁話：「哈，乜又係你！」