特首跑馬仔賽事因為梁振英高調「操練」而吸引眼球，雖然CY幾乎日日晨操，務求以黑馬姿態跑出，但目前嚟講最熱嘅依然係入閘好耐兼夾有愛國愛港血統嘅唐英年。不過，政治嘅嘢一日都嫌長，所以就算唐唐家陣狀態大勇，都唔代表佢可以帶到尾，尤其公民黨噚日開始就政改問題向呢位「準」特首候選人翻舊賬，受到內外夾攻嘅唐唐唔知會點樣應戰？

翻查94年立法局紀錄

唐唐日前出席中大論壇時，被唔少學生好激動咁追問佢政改立場，但唐唐就顯得懶從容不迫，以爛gag迴避學生嘅挑釁性提問。但避得一時唔避得一世，識搞gag唔代表可以掩飾事實。
當日有學生話，記得唐唐曾經勸過港人要相信中央會喺07/08畀特區雙普選，唐唐一口反駁話冇印象咁講過。冇印象啫，即係冇否認有講過啦。公民黨對呢位準特首候選人公然反口極度睇唔過眼，特登翻查當年嘅立法局會議紀錄，發現94年時做緊立法局議員嘅唐唐，曾經喺6月29日嘅會議中講過：「《基本法》附件一及二寫得很清楚，到了2007年，港人有自由決定立法會將如何組成」，仲同時表明「60席直選是一個很好的目標，是一個最圓滿的方法」，換言之都係叫港人相信07/08有普選啦。

學煲呔玩鋪勁咁失憶

15年前身為年輕才俊嘅唐唐既然呼籲港人相信07年有真民主，15年後變身司長嘅佢冇可能當粉筆字乜都抹晒。所以公民黨噚日就帶隊去政府總部請願，將向來對住煲呔嘅矛頭改為指住唐唐，直斥堂堂特首煲呔玩失憶扮唔記得自己講過要喺政改上玩鋪勁固然好離譜，家連疑似候任特首都一齊患上失憶症，希望有機會成為未來特區揸fit人嘅唐唐可以了解港人政改訴求，否則唔使旨意港人會支持佢。
人怕出名豬怕肥，繼梁振英被摷番疑似共產黨黨員身份呢單嘢出嚟講之後，唐唐點都估唔到十幾年前嘅政改言論都會成為箭靶，睇怕兩位特首大熱嚟緊都要醒醒定定。

mailto:[email protected]