當年今日
關於我們

劉江華做形象顧問 - 李八方

蘋果日報 2006/12/22 06:00


民建聯第二梯隊一直都幾多亮相機會,蒲吓蒲吓,話唔定有朝一日俾政府睇中,有可能成為第二個陳克勤呢。
噚日副主席劉江華帶咗四位副發言人老廣成、陳曼琪、王詩展同陸偉傑出嚟同傳媒見面。劉江華話個黨會向政府推薦佢哋入諮詢委員會,更希望四位喺區議會選舉中有機會試吓腳,但得唔得呢,就要靠各自修行。
其實呢四位副發言人都要不時向自己跟嘅師傅(即係民建聯立法會議員)交功課。王詩展每兩、三日就向師傅蔡菜子送「信」,講吓自己意見,真係極具誠意;就算唔係情信,蔡菜子都肯定勁冧。老廣成話師傅譚耀宗教佢好多嘢,但不得不提劉江華,事關佢會教大家着乜衫見記者最好,儼如佢哋形象指導。唔知幾時佢自己都嚟個形象大革新,劉江華變劉德華呢?