成個老襯，從此被困。今年對公民黨黨魁楊岳橋（AY）嚟講，梗係特別啦，事關呢一邊嘅月娥以777姿態上場，另一邊嘅「娥頸橋之戀」正式落幕，皆因AY同女友、即係家陣嘅楊太拉埋天窗，告別單身生涯！

咁，2018年嘅願望，會唔會係生番幾個？係就係想要返幾個，但唔係講緊年生貴子，而係重奪議席。AY明言新年願望係民主派全取六席，除咗希望3.11補選嘅九西、新東同港島區直選，以及功能界嘅建測界由民主派攞番，若九西同新東另一議席空缺有補選，同樣唔好畀建制派搶奪。佢話大家若對人大常委嘅無理好憤怒，呢個就係最文明嘅方式，去對專橫政權展示不滿兼表達控訴！