高官言論被當耳邊風，可能都唔係最慘嘅事，被人當透明應該更悲凉。港大民意網站噚日公佈副局長同政治助理嘅市民認知度調查數據，17個人認知度都不足2%，逾九成市民講唔出佢哋個名，而政制及內地事務局副局長譚志源同食物及衞生局副局長梁卓偉認知度都吞蛋。

上近一年市民零認知

三名政治助理伍潔鏇、徐英偉同葉根銓認知度亦係零，淪為有名有姓隱形人，唔知算唔算做官最高境界。民意研究計劃總監鍾庭耀指出，呢班官員已上任差唔多一年，但市民認知度偏低情況持續冇改善，有五個人認知度毫無起色，顯示巿民仍然不認識呢個團隊，情況有待改善。
另一方面，改組後嘅行會成員最新民望噚日亦出爐，夏佳理有57.1分居首，其次為梁振英有51.4分，較上次高1.4分，對蠢蠢欲動嘅梁振英應該有鼓勵作用。排第三嘅係劉江華，有51.1分，新加入嘅劉皇發有46.4分。
身在日本嘅梁振英又喺自己個blog憑花寄意，慶幸趕及「搭尾班車」去東京賞櫻，佢又話之前引用兩句詩「一片飛花減卻春，風飄萬點正愁人」，寫華盛頓櫻花凋零，純粹談經濟，冇其他意思。