今個聖誕，星戰熱殺到埋身，激光劍lightsaber成為潮流，財政司司長曾俊華今晚亦應迪士尼樂園邀請，同幾個受助家庭一齊入場睇《星球大戰：原力覺醒》，仲做埋潮人，攞住lightsaber大合照。

財爺致詞時話呀，第一次睇《星球大戰》係1977年，當時由夏里遜福（HarrisonFord）做主角，點估唔到38年後，仍然睇到新一輯《星戰》，而主角，竟然都係福伯喎。鬍鬚曾笑稱福伯算係「耆英」（畢竟都73歲咯），但仲係男主角喎，當堂令自己嘅信心都返晒嚟，皆因鬍鬚曾都係64歲啫。