鄭希怡（Yumiko）最近鍾情日本品牌Scolar，她日前穿上該品牌價值五百元的和風上衣，變身東洋型女。Yumiko貪Scolar的服飾夠長身，讓整個人看來更加修長，配襯一、兩件特別的飾物，便即亮麗醒目。

鄭希怡近期愛穿甚受年輕人歡迎的日本品牌Scolar服裝，喜其價錢經濟，又易襯衫。日前Yumiko以充滿濃濃和風味的Scolar上衣襯Levi's特別版牛仔褲亮相，再配上近期大熱的襪套，腳踏underground黑色短靴，顯得有型有格。

花紋如刺繡
Yumiko平時的服飾多是自己配搭，她偏好一些較長身的衣服，冬天則喜歡以靴來襯衫，她覺得將襪套箍在靴上，型格配搭更添潮味。
Yumiko身形高䠷，所以穿起長身的衣服更顯修長，她說：「Scolar啲衫多數比較長身，而且款式好有和服feel，加上衫上花紋做到好似刺繡一樣，所以我覺得好特別，而且佢哋啲衫唔算貴，我入咗好多貨都只係花咗五、六千蚊，真係好抵着。」

重整體觀感
Yumiko又提供一些配搭飾物的心得，她說：「其實好多時飾物嘅款式唔使太誇張，而且唔一定戴得多就好睇，最重要係整體觀感，有時戴上一、兩件飾物就已經好突出，好似我只係戴咗一隻好sharp嘅戒指，就可以令人留下印象，我重會將MP3機當成鏈墜，作飾物之餘又可以聽歌仔，一舉兩得。」