李八方online︱梁振英開地圖炮 港區人大、建制派班長都中招
蘋果日報 2020/12/03 15:43
梁振英建制派劉慧卿馬逢國廖長江
喺政治正確當前，建制派連見外國領事嘅權利都會自閹，一係向外交部申請，一係索性唔好去。而一向以狙擊民主派人士為樂嘅鍵盤打手、全國政協副主席梁振英，噚晚就上載多張民主派出訪外國見政客嘅相片，仲憤然寫道：「罄竹難書，忍無可忍」，不過其中有張相係包括港區人大代表黃玉山、建制派班長廖長江同埋馬逢國，唔通689對呢3位都「忍無可忍」？
689噚晚發功，係Facebook連出10個Posts張貼多張民主派人士去外國見政客、接受訪問嘅相，仲寫上：「罄竹難書，忍無可忍」。但八方睇真啲，發現有張相係前民主黨主席劉慧卿，加埋黃玉山、馬逢國、廖長江，一齊見前美國駐港總領事唐偉康嘅相。估唔到689唔止狙擊民主派，仲似乎要一次過搵出建制派的「壞孩子」
無啦啦被689「忍無可忍」嘅黃玉山回覆八方查詢時話，張相係喺銅鑼灣Japanese Club、日本領事Matsuda嘅離任酒會上影嘅，強調當時係應邀參加酒會，同場仲有好多人大代表、立法會議員、外國駐港領事等等，唔止佢哋3位添喎。
至於一眾梁粉就喺帖文留言問「若範（注：犯）國安（注：法）判一世？」又有網民質疑佢哋「奴才性格難改! 人渣!」八方考究唔到班網民係鬧邊位啦，之但係上得689 Facebook，究竟係好事定壞事，大家自有公論。
梁振英一次過鬧晒廖長江（左一）、黃玉山（左二）、劉慧卿（中）、馬逢國（右一）見唐偉康（右二）。梁振英Facebook截圖
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！