由河正宇、車太鉉、朱智勛等人主演嘅韓國賣座電影《與神同行》，下集《與神同行：終極審判》已落實將於8月9日喺香港上映，日前電影公司公開新海報，當中海報可見三位地獄使者河正宇、朱智勛及金香起嘅樣，但網民就指海報好似PS得太光，令到三人好似背晒光，完全睇唔清三人個樣。

不過韓國片方就澄清話：「本片描述三位地獄使者嘅過去，以及三人被隱藏千年之前嘅秘密。因為劇情主要涉及呢段被隱藏嘅過去，我哋亦試圖喺前導海報上營造更嚴肅、更黑暗嘅氣氛。」

《與神同行：終極審判》講述地獄三使者引渡千年最後一個貴人金秀鴻（金東旭飾），展開七七四十九日審判，準備四人一齊投胎轉世之際，鎮守家宅嘅成造神為搶救爺爺亡魂，不惜挑戰一切規則，翻轉人間，觸怒閻羅王（李政宰飾）。地獄三使者為重整人間秩序，一方面帶領金秀鴻繼續地獄審判，另一方面於人間與成造神正面交鋒，更意外驚醒所有人嘅前世記憶，因果迴旋之下，各大神祇將於49日狹路重逢，迎戰終極審判......

更多韓流，喺晒《娛果》
http://fb.com/appledailyent