身為男團女團成日都會收到粉絲送嘅禮物，有啲粉絲就肯花巨款買禮物畀偶像，但粉絲點諗都諗唔到，自己偶像竟然唔珍惜佢哋送畀佢哋嘅禮物，反而仲將佢哋放滿晒自己心意嘅禮物轉送畀人，而那個人仲要係偶像個女友，你話個粉絲係唔係好心痛呢？

話說去年出道嘅新人男團HALO成員近日就被爆將粉絲嘅禮物轉送畀女友，佢哋所屬嘅HISTAR事務所就對此作出回應，並向粉絲表達咗歉意，HISTAR方面就通過官方粉絲俱樂部留言：「近期，HALO成員引起咗各種爭議，在此由衷地向大家表示歉意。發生咁嘅事，公司亦都有好大嘅責任。HALO作為新人卻有失新人嘅風範，讓大家感到失望。我哋會一一反省。無論我哋講啲乜嘢，都唔能夠治癒粉絲所受到嘅傷痛，但目前HALO成員們對於此事都覺得慚愧，深刻地反省緊。我哋保證今後絕對唔會再出現類此事情，HALO一定會更加努力。對於此事，我哋再次向大家表示深深嘅歉意。」

據了解，因為唔少網民通過各社交論壇爆料，指HALO成員OOON鄭永勳和潤東都有圈外女友，佢哋不時喺網上談情，或者發佈晒幸福照片，當中OOON曾喺錄影MBC綜藝節目《偶像運動會》時，佩戴上同女友同款嘅情侶手鍊，更喺途中親吻手鍊示愛；而潤東亦將粉絲送畀佢嘅禮物轉送畀女友；部份成員仲丟掉粉絲送畀佢哋嘅禮物同信件。

而唔少網民都鬧爆HALO嘅行為，有唔少粉絲都話對偶像徹底失望，相信佢哋都要再花花心機先成功0氹返掂班粉絲。