早排十級颱風「天鴿」橫掃港、澳，俾「天鴿」正面吹襲嘅澳門，災情嚴重，經濟損失更高達114億。(新聞連結： http://bit.ly/2vNwfLP )

生完囡囡Giselle嘅吳若希(Jinny)，一直留喺澳門同男友Alex照顧囡囡，做緊半個澳門人嘅Jinny，風災來襲時，試過遇停電2、3個鐘頭，又因為停水關係，要落手落腳用桶裝水。

因為生女，Jinny肥咗40磅有多，暫時未打算搬返香港住嘅佢，為咗復出鋪路，近呢幾個月，狂做運動同打拳，成功踢走近30磅，體重差不多回復做女嗰陣。

為咗上鏡靚，節食做gym減肥在所難免，問題係，戒口戒到口寡寡，見到想食嘅嘢又要忍口，嗰種滋味真係有啲難頂。日前(5日)黃昏約6點，有讀者黃太，見到吳若希同男友Alex，喺澳門新口岸附近嘅便利店買零食，黃太表示：「見佢哋企喺收銀櫃台隔籬嘅熟食檔好耐，聽到吳若希同男友講，好想食印尼撈麵，又話自己好耐冇食過，佢男友就一邊撳電話，一邊咦咦哦哦，個樣好似唔係咁想咁。」相中見吳若希手指指揀麵又揀餸，嗲得兩嗲，最終男友Alex屈服，等女友揀好就自動波排隊俾錢。

相中着住露膊衫加白色短褲嘅吳若希，驟眼睇，身形似乎已經瘦番到未生前，加上早前佢話已經停咗餵母乳，就算食零食，都唔怕影響阿女。大肚嗰陣乜都唔食得，人母間中放肆吓，其實都冇相干嘅。