無綫劇集《火舞黃沙》備受好評，劇中演員亦大受歡迎，女主角之一的佘詩曼昨日以應皮具店邀請擔任剪綵嘉賓，吸引了過百名市民圍觀。阿佘近日可以說是鴻運當頭，她於活動中更中了「頭獎」，事緣當舞獅進行採青將生菜拋出時不慎擲中其眼睛，阿佘第一時間掩面並說：「嘩，乜嚿生菜咁大嚿嘅。」場面十分搞笑。

「我同黎姿有偈傾」

日前有報道指阿佘與黎姿的fans於網上展開罵戰，阿佘更被批評唱歌雞仔聲，對此她說：「我唔係個咁易唔開心嘅人，我身邊啲朋友都話我唱得OK。Fans有咁嘅行為即係代表佢哋有睇套劇，係對我哋嘅一種支持，不過佢哋應該適當運用腦筋去辯論，當係訓練，但係唔好傷感情。我同黎姿成日都會傾心事，有時講吓女仔嘢、有時又會傾吓自己嘅理想對象係點。」
阿佘更希望憑此劇角逐年尾的女主角獎項，她亦預算到時會有更多是非傳出，她說：「是非到時實有，咪當係娛樂消息同埋宣傳途徑囉。」
而無綫在網上舉行《火舞黃沙》我最喜愛的角色中，暫時以蔡少芬領先，阿佘表示十分欣賞對方的演技並說：「蔡少芬年紀唔係咁大，但係要做一個畀人叫做婆婆嘅角色，佢一定有自己嘅矛盾，佢真係做得好好。」
採訪：李珮洳
攝影：陳順禎