DSE狀元出爐嘞，估唔到今年最受注目嘅除咗一班狀元，仲係過氣女狀元麥明詩身邊嗰位過氣男伴林作（過氣一詞係八方睇過報道估㗎咋，係咪真過氣，就得佢哋兩位先至知...）。姑勿論林作話向唔讀醫或law嘅狀元發放獎學金，大家buy唔buy？至少都引起界內熱話（而部份人恥笑居多），同時又引起部份人討論，讀書叻係咪真係要揀呢兩科？

身為男拔校友嘅田北辰，對此亦有話兒。佢對於母校有首個DSE狀元當然好高興，但就話香港教育最大嘅價值唔係出產幾多個狀元，而係呢個制度可以令幾多學生行到佢哋想行嘅路。佢直言：「係咪一定人人都要讀醫、讀會計，或者讀法律先叫成功呢？其實大家唔讀醫，製衣都得㗎，最重要係搵到自己嘅興趣，先可以一直努力同堅持」，好似佢對時裝有熱誠，揀咗呢條路，對足幾十年都唔厭。

與此同時二少亦話當年，話少年時好鍾意唱歌，仲同成班朋友一齊夾band，當初若然揀咗音樂路，話唔定今日都可以創一番事業！總之最緊要都係搵到專屬興趣，亦希望外界畀多啲空間年輕人，相信同支持佢哋嘅選擇。