「我唔係鍾意食你煮嘅麵，我係想見多你幾面。」呢句經典廣告對白，有畫面。

江若琳自從去年直認戀上「生煎包王子」蕭潤邦（Oscar）後，兩人感情一日千里，Oscar去年底求婚成功，將於今年12.23就舉行婚禮，o依家已經要開始籌備。Oscar呢排仲進行咗個秘密行動，日前終於喺Instagram洩密，佢貼出一張店舖裝修相後留言：「新店開始裝修，Are you ready？」據知Oscar一直想未婚妻江若琳學吓做生意，多一條出路，所以斥資7位數字搞一間新舖畀江若琳打骰做「生煎皇后」。

前日下晝5時許，Oscar返咗深水埗店巡舖，然後再獨自走去相隔約200米嘅新店睇下裝修，佢先到舊舖入廚房打點，又招呼街坊，趁人客較少時就急步去新店睇裝修進度，佢就係咁來來回回兩邊走。

《蘋果》今日打畀Oscar求證，佢話：「唔好話送定唔係送，佢同我都冇分你我，我又唔係富豪。」Oscar當年歌手出道後轉行做飲食，轉眼都8年，佢好想將對飲食業嘅認知教埋準老婆江若琳，等佢可以有新發展。Oscar話同江若琳拍拖嘅一年，夫唱婦隨睇舖同參與開新店，Oscar覺得未來老婆都好有生意頭腦，所以想開一間新店畀佢試吓做生意：「新店以佢想法為主，佢從冇做過飲食生意，有時諗法會有新意。佢雖係門外漢，但佢好有煮嘢食天份，有時睇完YouTube，佢都煮得番出嚟。」Oscar呢個決定係咪想綁實江若琳轉行？佢否認：「佢會一路做，一路演呀，人應樣樣學啲。」

對於Oscar送完求婚鑽戒，再加碼送新舖，江若琳好驚喜話：「今次係我第一次踏足飲食業，心情緊張又興奮，我完全未試過經營一間餐廳，好彩有身邊人提點畀意見，我過去一年跟住Oscar都學到啲嘢，希望到時大家多多支持。」佢仲透露新店主打將伯係賣麵。　

江若琳將應邀做《杜汶澤喱騷》嘉賓，佢噚晚撇低未婚夫去阿澤個live，當然畀阿澤笑佢成日放閃，江若琳話：「佢哋冇玩我，今晚玩溫情，哈哈哈哈。」江若琳話遲啲阿澤會帶佢同「生煎王」出埠拍攝佢哋預支蜜月旅行：「阿澤好似好朋友角度見證我哋日常生活。」

精選娛聞，喺晒《娛果》
http://fb.com/appledailyent