𠵱家AV發燒友、IT人好識嘆,都好鍾意喺屋企邊飲紅酒邊聽歌睇戲。好似電腦商會會長張耀成(Jacky),屋企一早裝咗投影機睇數碼高清廣播節目。佢話開住大投影睇戲,再飲番杯紅酒,睇戲投入啲,又可以減壓。
Jacky仲寓娛樂於工作㖭,貴為油麻地MK1數碼廣場嘅行政總裁,個場賣電腦、影音產品一啲唔出奇,今個月中佢引入一間香港美酒薈,仲賣埋酒。小藍早幾日踩上門,順手開支紅酒問吓Jacky點解咁有創意。佢解釋話,既然咁多AV、IT友咁鍾意飲紅酒,咪等佢哋喺同一個場一次過買機買酒囉。父親節啲客喺雷射影音買機仲有紅酒送,遲啲又會搞IT研討會,「大家摸住酒杯底傾,好feel啲」。