NBA有一種男人叫神！只係講佢個名就夠震撼！8、90年代有「波神」米高佐敦（Michael Jordan）！90至千禧年代就有「戰神」艾華遜（Allen Iverson）！自從呢位只有6呎高嘅76人名將喺13年退休之後，球迷好耐都冇見過矮仔後衛可以得分當食生菜，直至I湯馬士（Isaiah Thomas）嘅出現！

「IT4」喺香港時間禮拜四帶領塞爾特人主場鬥速龍又爆seed啦！喺第4節轟入19分，全場貢獻44分、7助攻，助半場落後11分嘅塞軍反勝109:104，5連勝喺東岸排第2！

點解話佢追逐戰神嘅身影呢，除咗係因為AI同I湯馬士有交情之外，「IT4」暫時以29.7分排喺聯盟得分榜第2，僅次於場均30.7分嘅雷霆後衛韋斯卜克（Russell Westbrook）。如果啟動終極幻想式（FF mode），5呎9吋嘅I湯馬士最後可以攞到得分王，就可以成為繼AI之後，另一位矮仔得分王！