張家輝、郭采潔同張繼聰等，噚晚出席《陀地驅魔人》首映，導演兼主角嘅張家輝型爆西裝look現身，而郭采潔就身穿黑色deepV裙示人，性感大方。張學友、余文樂、陳慧琳﹑吳君如﹑邱淑貞及梁家輝等都有出席，星光熠熠。

張家輝﹑郭采潔及張繼聰一齊接受訪問，張繼聰同今屆金馬最佳男配角白只係老友，佢就話：「我同我老婆喺屋企睇到喊，我哋自己攞獎都冇咁開心，我哋係同學，我知佢係一個好演員。(白只公開多謝你？)係啊！佢係我另一半，好朋友到連我老婆都呷醋，我老婆都好鍾意張家輝。」而在旁家輝就即話：「我喺《大追捕》入面，勒到嗌救命。」