無綫新劇《師奶股神》今晚出街，由《師奶兵團》女主角之一嘅商天娥擔正，內容環繞師奶娥姐炒股賺錢，連番擊退大鱷。套劇未出街，已經觸動散戶神經，話有不祥之兆。喺網上討論區，上個禮拜有網友話，自從套劇開始宣傳，港股就受詛咒，恒指由5月初高位顯著下挫，累跌5.9%，「天娥效應」勢接秋官嘅「丁蟹效應」。
網友Tmchu007話：「套劇嘅威力史無前例，一開始宣傳，股市就跌，到出街時港股會唔會跌到失控，繼秋官效應之後，天娥效應更厲害？」牛仔骨就話：「不如套劇改角色名，叫丁蛾，講佢係丁蟹嘅後人，仲有噱頭。」
眉精眼企嘅neb2008發現，「啲電視劇搵股市做題材，多數都冇乜好帶挈，拖累股市。」睇番呢十幾年，以股市做主線嘅電視劇，無綫同亞視夾埋有3套，播映期間，股市兩跌一升。

獨《縱橫四海》脫咒

散戶最記得梗係無綫經典《大時代》，奠定散戶聞之色變嘅「丁蟹效應」，92年首播嗰個月內，恒指最多插水兩成，另一套亞視拍嘅《世紀之戰》，亦由秋官擔正，2000年播映時港股最多跌15%。由陶大宇做主角嘅《縱橫四海》好彩啲，播放前後港股勁升三成。
查實《大時代》播映前，港股已連升3年，恒指累升超過兩倍，試問又點會唔出現大調整，至於《世紀之戰》出街前，恒指已經開始插水，跌勢已成。今日出街套《師奶股神》，又適逢恒指踏入熊市，睇怕「天娥效應」都冇乜走雞，至於丁娥有冇機會取代丁蟹，大家拭目以待。

電郵：mailto:[email protected]

股市題材劇集對港股影響

劇集：大時代　電視台：無綫
播映年月：11/1992　播映期間最大跌幅：-20.1%　整體變幅：-12.7%

劇集：縱橫四海　電視台：亞視
播映年月：03/1999　播映期間最大跌幅：不適用　整體變幅：+30.2%

劇集：世紀之戰　電視台：亞視
播映年月：09/2000　播映期間最大跌幅：-15.2%　整體變幅：-8.3%

劇集：香港傳奇-榮歸*　電視台：亞視
播映年月：07/2007　播映期間最大跌幅：-5.0%　整體變幅：-5.5%

註：*部份劇情涉及股市
資料來源：本報資料室