男子組合BOP（前名天堂鳥）今日喺商台宣傳新歌《SetMeFree》。BOP三子透露新歌MV係自編自導自演兼低成本。問係咪好似早前憑900蚊低成本製作MV《SugarBaby》彈出嘅組合FFx？三子話：「如果唔計抄牌320蚊，真係唔使900蚊，因為幫手嘅都係朋友同同事，就算有航拍，架機都係借。」

三子表示最近為參加內地歌唱比賽節目《麥王爭霸》，推咗好多香港工作，問到係咪收到好高酬勞？佢哋就話：「因為自己參加，所以得車馬費，同抄牌（罰款）差唔多。」佢哋又透露小肥同海俊傑都有份比賽。