當年今日

馮仁昭四圍超:肥安雅搵張玉珊減磅

蘋果日報 2002/03/03 00:00


張玉珊、安雅、蕭若元同恬妞,前晚喺尖沙嘴出席「終極修身之旅2002」記者招待會,安雅重即席度身同磅重,以迎接張玉珊間修身堂贊助嘅免費減肥。

暴肥十八磅
安雅着住tubetop同短褲見人,果然係肥咗好多,佢即場度三圍,三圍分別係32.25、29.5同38吋,而佢大髀就有21.5吋、手臂有11.5吋,脂肪含量25.5,全身體重52kg(約115磅)。
安雅話:「過咗年我肥咗十八磅,我希望兩個星期可以減磅成功。如果減磅成功,我可能會幫佢哋做代言人。」安雅以前曾經係楊采妮旗下嘅藝人,但𠵱家合約已經完咗,重已經攞番晒啲尾數。

恬妞減十磅
而蕭若元因為有睡眠窒息症,所以令佢「的」起心肝減肥,佢見自己都有啲成績,於是介紹即將喺新劇扮道友嘅恬妞去減肥,兩個星期已經減咗十磅。張玉珊話會再為恬妞減多二十磅㖭!恬妞話:「我減到個胸由F-Cup變成E-Cup呀。」
天后靠電腦執靚樣
有個好紅嘅天后級女歌手,每次做雜誌嘅封面,都唔肯俾雜誌嘅攝影師影相,而係搵一個御用嘅攝影師影一大批相,再分發畀雜誌登。佢咁做有一個好處,就係方便個御用攝影師喺啲相度做手腳,用電腦將對腳執到有咁幼得咁幼,塊面有咁滑得咁滑。啲明星咁鍾意話記者作嘢,唔知咁樣執相法,又算唔算係「作嘢」呢?
半休女星送外賣買名牌
有個已經係半退休狀態嘅女星,𠵱家偶然都會出吓嚟,雖然話佢有男友,但其實佢由入行開始,就送外賣做兼職,佢重收得幾貴,唔係普通人可以包得起。所以佢買起名牌衫上嚟,真係嚇親人,同一個款可以買晒唔同色,難為佢男友知道佢啲嘢都可以啞忍,馮仁昭都覺得眼冤。

出位名人自忖命不久矣
娛樂圈好多人都鍾意批吓流年運程,最近有個出位城中名人就搵咗個出名嘅堪輿學家算命,點知相士同佢咁講:「你做人要開心啲,呢兩年鍾意做乜就去做,食乜就去食,凡事唔好鑽牛角尖,總之你過得開心啲啦。」個出位名人一聽,心諗自己唔通會有乜意外,過埋呢兩年就玩完?佢份人又好信風水命理,結果大受打擊,搞到最近言行都極之出位。據知呢位出位名人平日沉迷索可卡因,索得太勁搞到神志都有啲問題,再咁落去,唔使意外,自己身體都頂唔順啦。

年輕偶像啪丸開工頻NG
最近有個年輕偶像拍一部青春片時,同個導演搞到唔係咁愉快,馮仁昭聽個導演講,話呢位年輕偶像真係好離譜,竟然可以食晒軟性毒品嚟開工,搞到拍一個動作鏡頭都唔知NG幾多次,導演見佢魂遊太虛,索性跳拍其他鏡頭先。唉!好心嗰位年輕偶像專業啲,拍戲唔同唱歌,點可以食晒藥去開工?!
演技小生先天性無能
電影界有一個演技派靚仔小生,都叫做幾紅吓嘅,重有唱過吓歌,外界都覺得佢浪漫多情,但原來呢位小生其實係性無能嘅,而且係先天性遺傳嗰隻,睇極醫生都醫唔番,所以佢成日媾女,目的都只係為咗證明自己「掂」。馮仁昭知道呢件事都覺得佢好慘,因為佢真係幾鬼靚仔,認真嘥晒!

小氣天后搶戲失好友
最近某天王同某天后因為拍片搶戲問題而發生誤會,搞到互相嬲咗對方,中間重夾住個女主角。話說本來天后喺部戲入面係女主角,但佢成日遲到,劇本改改吓搞到佢連主角位都冇埋,於是成條線畀晒好搶戲嘅女主角發揮。天后當然唔開心,有次女主角唔小心撞到天后,天后懷恨在心,特登喺一場戲入面搞到女主角走光出醜人前,之後重所有宣傳都唔去,天王覺得天后太小氣,就幫理不幫親力撐女主角,天后見同天王咁多年朋友竟然幫外人,卒之就朋友都冇得做囉。