好多球星都會做品牌代言賺外快，巴西球星卡卡亦都同過內地喉糖品牌金嗓子賣過廣告，但由於橋段極為老土，當時引嚟廣大網民強烈恥笑。而前車路士隊長、今個夏天去咗維拉嘅泰利今次就「被代言」，事源印度一間煙草商Gold Flake用咗佢張相嚟做警告圖片，大大張相貼咗係個煙盒度，仲畫到佢個肺變咗黑色。

雖然嗰警告圖片印到好模糊，但查實明眼人一睇就知係泰利嚟，所以件事搞到佢勁嬲。泰利將個煙盒po咗上IG，仲鬧爆嗰間公司做法惡心，又話自己好憎食煙。

泰利嘅代表就確認，泰利會對Gold Flake採取法律行動，因為嗰間公司未經批准就用咗佢張相。但有印度官員就話，張圖同泰利冇關，成件事只不過係巧合。至於係咪巧合咁簡單，相信只有Gold Flake自己先知。