劉嘉玲今日就以一身大露背，現身澳門新濠影滙世紀開幕禮，仲向記者大派飛吻，問到三個荷里活巨星馬田史高西斯、羅拔迪尼路及里安納度之中，最鍾意邊個，劉嘉玲就話：「羅拔迪尼路，完全冇得輸，係我心目中電影世界入面嘅偶像，佢每一套戲都有睇。」

今次係嘉玲第一次見羅拔迪尼路，佢話幾年前梁朝偉同羅拔迪尼路見過面，佢話：「我叫佢點都要影張合照，但梁生就怕醜，我就同佢講為咗我點都要影一張，最後都有影到。」

嘉玲又話佢哋讀藝員訓練班嘅時候，都係用羅拔迪尼路嘅戲做教材，係佢哋一個好重要嘅人物，問到會唔會集郵，嘉玲指見到都好開心，講到想唔想食飯，佢就即刻話：「好啊好啊！好想同佢拍戲，我瞓喺度唔講嘢都得。」

而何超儀就同埋老公陳子聰一齊到場，問到超儀最想同邊個坐8字摩天輪，佢就話當然係同老婆坐。