由金秀賢、孔孝真、車太鉉同IU主演嘅KBS劇集《製作人們》噚晚播出第六集，前四集主要集中講電視台嘅生活，加上新穎嘅拍攝模式，可能觀眾一時唔習慣，新劇收視一直徘徊於10-11％。不過呢兩集啲感情線就推進得好多，更成功推高收視達13.5%。

於最新一集中，除咗金秀賢同IU有親密互動外，金秀賢同孔孝真之間嘅感情線亦越嚟越明顯，而金秀賢見到孔孝真同其他男人好熟絡地相處時又會表現得非常呷醋。到最後一幕中，金秀賢更大膽攬住孔孝真，加埋一句：「對唔住，我感覺我要闖禍啦。」瞬間由呆頭呆腦嘅新人導演變成溫柔魅力男，令觀眾都睇得好激動，收視立即又前一集嘅11.2%上升2.3％，於全國收視中錄得13.5%。