吳岱融噚晚喺尖沙嘴出席微電影《師徒》嘅慶功宴，同時宣佈推出全新EP《風大浪大》，事隔25年再出新歌嘅吳岱融笑言：「出年60歲仲出到歌，係一個好好嘅紀念，呢首歌亦係微電影主題曲。」

話晒隔咗咁耐先出碟，唔知到時會唔會親自去買碟？佢話：「我都唔知有呢個『行規』，多謝你哋提醒，一定會留番俾自己同送畀朋友。」又透露剛同太太鍾淑慧去新加坡旅行兼慶祝結婚23周年：「囝囝喺嗰邊讀書，就去陪吓佢，都唔想屋企人分太開。」

講到陳凱琳早前宣佈懷孕，曾合作劇集嘅吳岱融即表示：「真係聽到都好戥佢開心，都有恭喜佢，結咗婚咁快就有BB，人生就有個好開心嘅家庭，衷心祝福佢哋。」

精選娛聞，喺晒《娛果》
http://fb.com/appledailyent