根據天文台預測，「海馬」應該快來快去，若果無雨，會在正常場地角逐，香港兩個馬場去水速度，快到嚇死人，相信日內儘管有大雨，也不會對周日（23日）的場地帶來甚麼影響。
今朝（20日）晨課已無受天雨影響，出操馬多到睇唔切，六點半耙地後，開埋草地跑道，除大摩、沈集成這兩位常客，有多駒出試外，估唔到呂健威再安排「幸運如意」，因周一（17日）已與「軍火」在草地拍跳，以其一貫操法，甚少會有連續兩課草地的編排，感受到唔係純想熱身。
除呂健威外，柏寶對「幸運如意」也超級重視，早在八月頭已操番，幾乎包辦這兩個月的快、慢工夫，記憶中，柏寶應未試過對一匹馬如此上心。呂健威採取循序漸進方式，逐步加壓，試過兩課大閘後，周一草地拍「軍火」，已見番必要有的勁勢，今朝單試，由於已不須跳得太快，全程被按實順走下，「幸運如意」無扭擰，輕鬆地跳兩段，跳完回程，神態活躍又唔急，比起早前再好一點，以首仗復出而言，稱得上起得恰到好處！
呂健威做足本份，落場靠騎師發揮，柏寶跑這些嫡系馬，通常唔會有騎呢跑法，令人信心強得多，同組對手來去仍是這數駒，「友瑩格」同樣未熱身，健康受過挫折，唔知跑得番幾多水準，跑過的「幸福指數」，用何澤堯孭死磅多，比較下，「幸運如意」無一瓣輸蝕。