【本報訊】美心旗下的元氣壽司去年推出高速線送壽司吸客，集團日式連鎖餐飲業務總監葉育康指，香港人貪新鮮會特地幫襯影相，車仔送壽司得小朋友歡心，吸納更多家庭客，旗下5間高速線分店生意額較迴轉壽司分店增兩成。
火車送壽司非元氣獨有，葉育康指模式易抄，食物品質及規範化卻難抄，高速線落單至送抵客人手中僅需數十秒，亦帶起分店氣氛，形容分店現似幼稚園，客人「見到車仔嚟就好開心，會同高速線影吓相同上載社交平台」。

翻枱率變慢　人均消費升

送餐速度加快卻不代表翻枱率加速，葉育康坦言去年8月轉型後的翻枱率變慢，全因「大家當遊戲咁玩，本來高速線一次可以落單8碟，但客人想體驗就會逐碟逐碟落」。
葉育康指，食客逗留時間雖延長，但在改用電子餐單後，客人不再睇住色碟（代表價錢的顏色碟子）轉，無形中叫多兩碟，提升人均消費3至4元，想體驗高速線的客人亦願意早到等位，令淡靜時段生意轉旺。
他指，分店變身高速線成本需增約40%，但人流穩定有助進駐商場或傾租約，故今年計劃開6至7間高速線店，包括新店或舊店轉型。
本報曾到配備高速線送壽司的元氣太古分店門外視察，發現多屬家庭客，當中蔡太及兒子指火車送壽司「有生氣啲，吸引到小朋友」。但同區居民邱小姐認為改裝後餐廳位置變少兼「多了小朋友，又要同架車影相」，令星期六日要大排長龍，惟有提早到店外等位。