大陸實施咗「限韓令」、「禁韓令」已一段時間，不過近日就似乎有放寬嘅意思，多名韓星都先後到大陸搵銀，好似韓劇《金秘書為何那樣》男星朴敘俊、《太陽的後裔》女星金智媛等都有到大陸工作搵銀，而噚日就到韓國女團少女時代隊長泰妍孖師弟男團EXO成員燦烈襲上海，出席時裝品牌活動。

另外，少時成員徐玄雖然冇同SM事務所續約，但佢同一班少時好姊妹感情依舊，近日徐玄忙於拍攝劇集《時間》，少時都好有心，送上餐車為佢打氣，孝淵更到拍攝現場探徐玄班，令徐玄話好感動，徐玄將照片放上網，又留言話：「見到姐姐眼淚都要下來，點解呢？喺我疲憊嘅時候帶來極大感動，非常感謝你哋，你們知道我很愛你們吧。雖然分開了，但我的心一直同姊姊一齊。」

而《時間》繼男主角金正鉉因厭食及失眠關係宣佈退出劇集後，近日有網民就喺網上指劇組拍攝時非法泊車，阻塞居民車子行駛，同埋令附近便利店受到損失，又疑似霸佔便利店嘅座位，受到網民爭議。《時間》劇組今日就事件道歉，就泊車問題阻礙咗居民出入及對便利店造成損失而深感抱歉。同時製作方更派出員工親自向市民道歉。

更多韓流，喺晒《娛果》
http://fb.com/appledailyent