關楚耀(Kelvin)今日喺商台宣傳新歌，接受嘟姐(鄭裕玲)節目訪問，Kelvin自爆畀嘟姐訓話：「嘟姐叫我唔好成日唱慘情歌，因為我對感情都好沉重，同期嘅柏宇、柏豪都已經好幸福，已經結晒婚，我都想沖吓喜，問吓嘟姐有乜好介紹。」

問到佢對另一半有乜要求，同係咪要求好高？佢就話：「嘟姐就話我一定係鍾意長頭髮、眼大大、靚女同身材好。」問佢係咪講中晒？Kelvin就話：「人哋咁睇太膚淺喇，最緊要內心感覺，嚟得自然，舒暢同暢快。」

原來Kelvin兩年前同韓籍模特兒女友甩拖後就冇再拍拖，問佢係咪好dry？佢話：「呢兩年冇時間畀我dry，要拍戲同拍劇，今年希望可以放多啲時間喺音樂上，希望儲多啲歌年尾可以開騷，同fans親近啲，咁耐以嚟歌迷仍然咁支持，好難得。」提到好友何佩瑜同翁子光分手，Kelvin話同Jeana係好朋友，仲話可以約Jeana食飯傾訴吓，佢話：「等我打畀佢問候吓，作為朋友有咩需要就傾吓。」