阿士東維拉前鋒賓迪基提交咗轉會申請之後，即刻成為搶手貨，多間英超球會都想簽佢。其中熱刺就開出2,000萬鎊轉會費，另外再畀維拉喺伊高圖、柏加、積基李華摩亞同侯度史東4個球員之中揀1個，但問題係呢4個球員都係「豬頭骨」，維拉領隊林拔點揀得落手呀？
22歲嘅比利時前鋒賓迪基早前同維拉交咗轉會申請，維拉亦唔阻佢發達，但就講明至少要收2,500萬鎊，少一個仙都冇得傾。熱刺率先郁手，不過佢哋認為賓迪基最多只值2,000萬鎊，於是就同維拉提議用現金加1名球員嚟做呢單交易。消息指，熱刺領隊波亞斯開咗4個球員畀林拔揀，分別係伊高圖、柏加、積基李華摩亞同侯度史東，而對英超有啲認識嘅球迷都應該知道，4人當中得柏加算係似啲樣，弊在佢到10月就滿33歲，而且容易傷，所以我求大俠相信，林拔都幾難揀得落手。

4個冗員揀1個

話時話，只係值300萬鎊嘅喀麥隆左閘伊高圖係土超費倫巴治嘅收購目標，英格蘭中場侯度史東就盛傳俾新特蘭睇中，員柏加同埋積基李華摩亞就同今季降落英冠嘅昆士柏流浪扯上關係。換言之，就算波亞斯唔用佢哋嚟買賓迪基，佢哋亦應該唔會繼續留喺白鹿徑球場。

維拉唔愁冇生意

不過，相信後者唔會咁易落叠，而且維拉由始至終都淨係想要現金，所以如果熱刺唔肯現兜兜畀2,500萬鎊，睇怕都搞唔成呢單交易。除咗熱刺之外，車路士同利物浦都對賓迪基有興趣，因此維拉真係唔愁冇生意做。賓迪基由於交咗轉會申請，故此林拔留佢喺英國，唔使佢隨隊去德國進行季前集訓，但佢唔可以偷懶，要喺波迪摩亞希夫訓練場，如常進行操練。