今日大賽日雷神當然連場出擊，頭場雖搏輸「東方快車」跑第三，但第二場五班千四米，馬上補中打開全日勝門，東廐「齊齊健康」由佢接手即贏，7.4倍之下為馬兒開齋，雷神季內首次幫告東尼建功之餘，更剃埋韋達眼眉，皆因韋達之前騎極「齊齊健康」都贏唔到。
反觀韋達今場接手「軍號」卻3.6倍大熱倒灶，表現同雷神係天與地之比。其實雷神同告仔唔算旺門組合，連合作都偏少，上次日馬「美麗飛翔」至係兩人2015年首匹合作馬，結果跑第四，今日再合作「齊齊健康」進步到第一，此駒留前鬥後，「福駿寶」拉士走甩晒都畀佢追到，雷神即係雷神，發力點掌握得恰到好處，「福駿寶」落飛失手屈居亞軍，37倍綠燈win落飛黨見財化水，不過就中番147倍綠燈Q，除笨有精。
第三名係連續三場跑位置之「白玉凱旋」，第四名係大冷門「電訊太子」，四重彩高達520,120元。