黃百鳴同吳君如下晝去咗旺角一間戲院為《百星酒店》謝票，老闆黃百鳴話年年都同志偉邵氐嗰邊打口水戰，今年終於贏返一年喇。

黃百鳴又話如果邵氏下年真係唔再拍賀歲片，叫志偉不如幫佢手拍喎。記者問佢下年會唔會搵林峯嚟同千語BB情侶檔合作，佢就話咁分分鐘會變咗愛情片，不過都有得諗，佢又讚千語公私分明，冇因為拍拖影響工作。

至於君如過年期間就去咗捧星爺場，仲話長毛陳可辛睇《西遊》笑到收唔到聲。對於舊拍擋杜汶澤嘅talk騷爆佢啲舊料，君如就扮嬲咁話：「係咪想反多次面呀？想爆多佢一次樽呀？我應該聽晚去睇，不過一去到佢就縮架喇」。佢又話阿澤應該有被迫害妄想症，又話自己唔介意舊事比人拎出嚟講，至多都係叫阿澤比掩口費，一係就出律師信告鬼佢喎。