借美股回升之勢，港股反彈，恒指叫做上升25點，但似乎冇乜勢。下跌股隻，比上升股隻多2成。中海油（883）升3.7%，帶動恒指進帳23點，滙控（005）升0.50元，又帶動恒指向上移18點。兩隻恒指成份股夾埋拉高恒指41點，即係其他31隻恒指成份股夾埋下跌16點。
中企P輪4726：國企指數升35點，全靠中石油（857）升3.4%拉高39點。油價再升，油股跟隨，油價高處不勝寒，追油股C輪要諗埋風險嗰便。
博油價回落拖低油股，又或博油股因超買而回吐，可以諗吓中企P輪，4726數據靚，9月尾夠鐘，輪價17.2仙，溢價1.2%，槓桿率11.1倍，（有效8.3倍），引伸波幅20.9%。隻輪最弊嘅係街貨極少，前日得0.67%，計落不過2球，不過昨日成交有17球。另外，4761數據亦唔錯，但成交金額比4726更細。
中石油P輪9010：中石油C輪因正股上升而意氣風發，高追唔化算。對着幹，博正股回頭，買P輪。隻隻P輪溢價都好高，勉強揀9010，貪買賣易，全日成交金額近2千萬，睇錯方向，都唔怕止蝕無路。隻輪溢價高，槓桿大，贏輸快過打針。
章盛