正所謂雙拳難敵四手，雷霆今季有前鋒杜蘭特（Kevin Durant）復出，同韋斯卜克（Russell Westbrook）重組最強火力孖寶，球隊氣勢當堂返晒嚟。上周五NBA常規賽作客魔術，兩人合共轟入91分，包括韋斯卜克射入38呎三分球將場波帶入加時，結果激戰至雙加時贏139:136，令魔術後衞奧拉迪普（Victor Oladipo）錄得聯盟今季首次大三元，都要輸波收場。

杜蘭特上季因為足傷二月就收「咧」，搞到雷霆緣盡季後賽；KD今季強勢復出，證明同「潮韋」韋斯卜克真係聯盟最強火力組合。佢哋第四節仲落後緊18分，但兩人夾手夾腳力追；完場前30秒最精采，兩隊夾埋入咗三個三分波，包括潮韋最後一秒射入長程三分波，追至117平手打加時。魔術奧拉迪普第一次加時射入三分，追成126平手打雙加時，全場錄得21分10助攻13籃板，係今季第一位「大三元」球員，但始終敵唔過第二次加時合力攞七分嘅雷霆孖寶；潮韋交出48分11籃板，KD亦有43分12籃板，係兩人歷來第三次單場各攞40分或以上（見附表）；要數之前嘅最強孖寶，就要數到公牛組合米高佐敦同柏賓嘞。