恭喜恭喜，恭喜一眾歌手朋友今日終於高中畢業喇。

今日下晝，女團APink成員夏榮、RedVelvet嘅Joy、Gfriend嘅藝琳、SONAMOO嘅宜珍，同埋正在同原本所屬公司TS事務所進行緊解約訴訟嘅男團B.A.P成員Zelo就齊齊參加首爾公演藝術高中畢業禮，同高中生活講拜拜。

雖然，佢哋平時喺舞台上又性感又型，不過著起校服上嚟，個個都好似小朋友咁，當接過畢業證書嘅時間仲笑得勁開心，童真十足。

另一邊廂，曾經演出劇集《懷抱太陽的月亮》、《一枝梅》嘅童星金有貞今日亦喺京畿道高陽市一山西區大化洞大松中學畢業，青春無敵嘅金有貞喺課室入面拎住張證書畀記者任影唔嬲，仲擺出V指手勢，得意到爆。