一連四日嘅復活節假期開始，高官同立法會議員會有乜節目? 去戲院睇早場可能係唔錯嘅選擇。有讀者今朝就喺數碼港戲院，見到最近煩緊取消強積金對沖同派錢問題嘅勞福局局長羅致光入場睇9點05分嘅早場2D版《悍戰太平洋2：起義時空》，坐正喺場中間。

之後讀者離開時，又再撞到另一政界名人，就係財委會主席陳健波，仲見到買咗飛睇同一套戲嘅波哥，同平日開財委會時一樣分秒必爭，喺門口催同行者快啲入場。

一連撞到兩政界名人，該讀者相信，主要因為該處人流較少，令啲政界中人唔使驚撞到好多人，而今次羅致光同波哥都係睇早場，每張飛都只需65元，可以慳返唔少錢。

睇返網上影評，有網民睇過呢套戲後話有啲失望，因為套戲由講以機甲獵人同駕駛員合作守護太平洋嘅主題，變成咗一部中國人救世界嘅中國化荷里活片，八方唔知兩位政界中人點睇？但肯定佢哋嘅電影選擇好政治正確囉。