二○一二年香港小姐亞軍黃心穎（Jacqueline）曾與吳啟華和王浩信傳緋聞，近日又有傳她與緋聞多多的李思捷（Johnson）撻着三個月，昨日有報道指心穎和李思捷在半年前合作拍劇而暗撻，不過因為女方要到內地工作，令戀情急凍，直到心穎回港兩人不時相約密會，結果正式撻着。
日前心穎更被發現，在旺角宣傳完劇集後，她本來坐大隊的車離開，但突然中途下車，行到另一個街口，登上李思捷的七人車返回男方位於何文田的寓所，直到深夜都未見離開。另一方面，報道又稱心穎行奶奶政策，早前被目睹與思捷的媽媽在佐敦食晚飯，其間兩人傾得開心，最後心穎先送李媽媽上車，待李媽媽開車後，才揸自己的車返寓所。

出騷後齊慶生

昨日向心穎求證，她在電話中說：「冇乜嘢回應呀，嗰日係活動後佢（指李思捷）車我，但我中途已經落咗車，所以佢哋話影到我入屋，事實我都唔喺度。」再問有指她得李思捷媽媽的歡心，她笑說：「嗰日係另外一日，係我上完佢個騷，成班人去食飯兼慶祝李思捷生日，所以我先有去，我哋係好朋友。」
採訪：唐心悠