上月曾來港開騷嘅韓國男團BTOB喺今個月20日就會喺韓國首爾開騷，早前仲有消息指演唱會門票喺上個月26日開售唔夠5分鐘就已經售罄。而為咗滿足一眾撲唔到飛嘅粉絲，日前韓國Olleh就宣佈會收費直播演唱會，點知就惹嚟粉絲炮轟呃錢！

據知，Olleh喺今個月6日主張只要粉絲付出9000韓圜（約59港元）就可以通過網絡睇到BTOB演唱會直播，但呢個做法就令之前用咗10萬韓圜（約654港元）買飛入場嘅粉絲非常不滿，投訴話早知唔飛咁貴飛入場，睇電視就得，而BTOB所屬事務所就即時解釋話：「其實係為咗買唔到飛嘅粉絲先會有咁嘅計劃。」

點知粉絲就覺得BTOB公司有心呃粉絲錢，留言話：「因為賣晒飛先進行直播一定係講大話，喺Olleh公開嘅宣傳視頻入面，BTOB著嘅衫同演唱會宣傳視頻中完全一樣，擺明早就已經做晒咁嘅準備，但竟然唔喺賣飛前公布呢個消息，嚴重違反消費者保護法。」、「如果喺5日後申請退飛仲要畀手續費，而Olleh剛剛好喺5日後先公佈直播消息，擺到明係公司嘅商業策略。」有粉絲仲要求取消直播。

另外，Olleh更公佈如果買咗直播嘅用戶仲有機會抽到演唱會飛，Olleh更會公開BTOB喺待機室嘅情況，對此，粉絲再次發火話：「比起晒10萬韓圜買飛嘅粉絲，晒9000韓圜買飛嘅粉絲仲有著數。」、「如果想大家一齊睇到演唱會，出DVD咪得囉，使咩用呢個方法。」