上個禮拜五，敏妮叫大家睇新聞炒股，仲用發豬瘟搞到豬肉價創新高，刺激雨潤食品（1068）股價做例子。其實，發瘟豬只係冰山一角，大陸嘅糧食問題將會越嚟越嚴重。

講番豬瘟先，報紙話引發豬瘟有幾個因素，首先係飼料價格上升，另外就係豬農濫用抗生素。用嚟餵豬嘅玉米價格的確有上升趨勢，點解？你之前咪炒過一隻新股叫中糧控股（606），記唔記得隻股有乜概念，咪就係近年興起嘅生物能源囉，用玉米、小麥轉化為燃料。畀你種玉米，你估賣畀人拎去餵豬個價錢高啲，定係賣去煶煉乙醇個價高啲。
咁樣落去，玉米價格只會越嚟越貴。豬農要用更高嘅價錢買飼料，梗係唔想隻豬有病嘥飼料，結果就惟有用抗生素力保豬命；物極必反，之後故事點發展，唔使敏妮多講。導致糧食問題又點止同能源有關，大陸濫用農地發展，農地賣少見少，中國人口又越嚟越多，敏妮相信糧食供應問題將會越趨嚴峻。

其實大陸「十一．五」規劃擺咗好多篇幅喺「三農」問題上面，所謂「三農」就係農業、農村、農民。根據規劃建議，未來將會推進現代農業建設，喺發展農業之餘，更注重到長遠發展，例如會積極推行節水灌溉、科學使用肥料同農藥，促進農業可持續發展。
中國領導人唔係短視嘅一群，敏妮都見到嘅問題，領導人冇理由視若無睹，加上喺國策度提出嚟，農業未來將會成為經濟發展嘅大題目。貫徹搵主題炒股方法，係時候對農業相關投資做吓功課，除咗豬肉股、玉米股，仲有化肥股、醫藥股等，相信都會係長線投資要注意嘅範疇。
除咗雨潤有「豬瘟」概念，敏妮都醒咗個貼士畀大家，有一家上市公司搞緊將飼料加入細菌，令啲豬唔會咁易病，又唔使用咁多抗生素，至於係邊隻股？今日開古。

中華藥業（8120）舊年9月買咗間JBC生物產品，呢間公司主要研製植物性益生素。你飲過益力多未？所謂植物性益生素就係有益嘅細菌，加喺啲飼料度，可以減少生豬感染呼吸道同消化系統常見疾病。敏妮唔係養豬專家，但JBC02年成立，03年研製出植物性益生素，舊年5月開始銷售，應該唔係空口講白話；係咪真係改善到豬嘅質素，尚待觀察，但對於投資者嚟講，最重要係呢支益力多可唔可以改善中華藥業嘅體質。
近排，中華藥業由於大股東揸嘅股票畀人偷咗，所以股價有啲波動，各位有興趣嘅，自己睇位喇。