韓國男藝人都比較避忌談及入伍嘅話題，因為大都擔心經歷過空白期後，會人氣下滑。其實現時圈中有唔少上位男星，都非常有先見之明，一早當完兵，依家就可以專注於演藝事業，力爭做男神。

日前韓國某網站就進行投票，選出「雖然入伍時間較早，但回歸後以優秀作品展現的明星」，近日憑韓劇《經常請吃飯的漂亮姐姐》帶挈上位嘅丁海寅，亦榜上有名。

現年30歲嘅丁海寅於榜中排名第三，據知佢21歲時入伍，服完兵役後先出道，之後通過各種角色逐漸展現優秀演技，今年更憑《漂亮姐姐》而獲得超高人氣，近期更頻頻拍攝新廣告，成功上位。

而排名第二係童星出身嘅24歲男星俞承豪，俞承豪拍攝完人氣劇《想你》後，於2013年3月低調入伍，並於軍中擔任新兵教育隊助教。俞承豪於2014年12月正式退伍，之後主演嘅《Remember－兒子的戰爭》、《君主－假面的主人》都獲得高人氣。

至於榜首，就係現時熱播劇《金秘書為何那樣》嘅29歲男星朴敘俊。據知朴敘俊於升大學時入伍，之後以演員身份出道，因此佢唔需要擔心空白期，近年演出嘅《Kill Me Heal Me》、《她很漂亮》、《三流之路》等劇都大受歡迎，外界都睇好朴敘俊可以成為頂級明星。

精選韓流，喺晒《娛果》
http://fb.com/appledailyent