滬港通首日也未試過！大陸基金買港股通撤限，造就單日有159隻港股通股票成交逾億，當中不乏中外資對戰的戲碼，港股就如當日03年開放自由行，強國大款踏入LV店就話，架上的手袋，我全要！未嚐過2007年大牛市的Samantha，報價機前睇到O晒嘴，終於明白為何中資大盤叫「解放軍」，果真無堅不摧，那股來勢洶洶、幾分鐘掃十格的氣勢，心跳不禁加快。

眼下A股已在4000點大閘前，不要問這是否合理，股市現實得只有錢話到事，識時務者最啱炒幾味強國概念，今日推介廣東省垃圾焚燒發電民企粵豐環保（1381）。《穹頂之下》，對付環境污染是阿爺前提中的前提，中金發表報告指，垃圾發電是一眾環保股最有前景的，未來幾年均複合增速達到30%至40%，因為垃圾發電較其他處理方法存優勢，加上滲透率低，增長潛力大。

粵豐環保份業績睇落好似冇乜亮點，全年純利增46%至1.9億元，其實份業績唔係俾我哋睇，而是俾各省政府睇，有錢賺能為這家中國第11大垃圾發電企業形象加分，為未來收購鋪路，家陣淨現金僅8.6億，收購兩三個話咁快用完，最簡單方法是炒上去，該股股價由上市到依家炒上37%，首十大券商竟持貨逾九成，不怕炒不上，只怕追不上班車！

中環迷你裙（Samantha）
https://www.facebook.com/stocksamantha