柴門文人氣漫畫拍成日劇《愛情白皮書》於90年代大受歡迎，23年前風靡亞洲觀眾，劇中五位主角中以木村拓哉、西島秀俊星運最好，如今仍然係日劇界一線男星。木村當年喺劇中飾演取手，反觀飾演其情敵掛居嘅男主角筒井道隆，近年工作量買少見少，有傳佢多年前被事務所雪藏，因而從幕前銷聲匿跡，如今佢一臉滄桑兼毫無光彩，接拍松山研一增肥演出新片《聖之青春》，筒井道隆更為角色變成大叔，唔少觀眾都話唔認出佢係乜水。

今年45歲嘅筒井道隆出道26年，佢原本打算去任職百貨公司，點知卻意外踏入演藝圈，93年佢夥拍石田光主演《愛情白皮書》，在日本播出時創下26.87％嘅高收視率，以暖男形象擄獲女性觀眾。筒井道隆比木村大一歲，至今都未結婚，佢身邊朋友表示，筒井早已看淡名利，近年演戲無論大小角色都接可也，為謀生才繼續演戲，近年佢私底下熱衷踩單車，甚至愛到廢寢忘餐地步，筒井曾相約好友組成車隊遠征越南，參加長達700公里嘅單車耐力賽。