現年43歲嘅韓國男歌手任昌丁今日再做老襯，今日會與細18年嘅徐姓圈外女友結婚。

任昌丁自從2013年同職業高爾夫球選手金賢珠離婚後，去年就被爆撻着女友，大人亦大方認愛，而早前已盛傳任昌丁同女友奉子成婚，預產期喺今年5月。今日任昌丁就同懷孕女友喺首爾江南區嘅驛三洞行禮，不過今次婚禮就會以非公開形式舉行，只會邀請親朋好友出席。

雖然一對新人唔會出嚟見傳媒，但今日就有佢哋嘅黑白婚紗照以及婚禮現場照及請柬流出，只見一對新人繼續貫徹低調作風，婚照大都以黑白色為主，二人更有情深咀嘴，認真sweet爆，不過最搞鬼都係張婚禮請柬，新郎哥竟然捐入去新娘嘅婚紗裙內，十分鬼馬。