民建聯今日公布佢哋舉辦第五屆年度漢字選舉結果，由於出任評審、對中文甚有研究嘅前立法會主席曾鈺成唔喺香港，所以就搵嚟佢嘅愛徒、港島區立法會議員張國鈞頂檔，喺著名藍絲導演高志森同專欄作家黃毅力陪同下公布結果。

根據民記選舉結果，最多人揀嘅係「貴」字，其次係「樓」字同「民」字。
張國鈞自行解讀，話香港巿民由細到大對個「貴」字都唔會陌生，大家都知道衣食住行樣樣都貴，笑言今次入圍三甲嘅漢字，可以理解為「巿民覺得啲樓貴」。

佢又自言對個「貴」字特別有感情，因為細個同屋企人喺屯門住公屋時，住嗰座樓都係以貴字命名，就係屯門山景邨嘅景貴樓，憶述當年喺景貴樓由小四住到讀預科，當年只係交幾百元租，之後做咗見習律師後，屋企人就交返間公屋畀房署，再喺屯門買二手居屋，其後佢成家立室後搬去跑馬地，近年再搬去北角，皆因老婆係福建人，老婆嘅父母都住喺北角，而佢現時一家人同外父外母都係民記東區區議員蔡素玉嘅選民，話由於蔡素玉多屆都自動當選，所以好耐都無喺區議會選舉投過票喎，唔知民主派會唔會喺新一屆區選，畀個投票機會張國鈞呢？