日本組合Morning娘前人氣成員安倍夏美，日前傳出婚訊，被爆佢就快同男演員山崎育三郎結婚，不過，佢哋一直冇否認亦冇承認婚訊。噚日下午安倍夏美單拖演出一個聖誕晚餐騷，今次係佢傳出婚訊後首次現身，門口就有大批記者等佢出現。

現年34歲嘅安倍，見到好多記者等佢都好驚訝，佢好有禮貌咁同記者打招呼，仲話咁凍嘅天氣要記者等佢真係辛苦晒大家，又叫大家明年都多多指教。不過，當記者追問佢婚訊時，安倍就笑到四萬咁口，話會搵機會向大家報告，跟住祝記者聖誕快樂就走咗。待嫁嘅安倍雖然全程表現得好開心，但係佢可能係化淡妝嘅關係，個樣成熟咗好多，仲有啲大媽Feel㖭。