噚日頭條新聞係糧食大漲價，除咗食米價格勁升三成之外，雞蛋亦大漲四成，呢兩類最基本糧食升得咁勁，基層市民真係好難生活。作為全球米價指標，泰國大米報價於上周四突從每噸580美元漲至每噸760美元，一日之內大幅調高31%，何以會咁激？

泰國有此舉動，全球第二及第三大大米出口國越南及印度，翌日隨即有所行動，越南將今年大米的出口量大減22%，印度也於當天公佈，將出口大米的最低價格大幅調高五成，由每噸650美元增至每噸1000美元，以紓解國內通貨膨脹的壓力。出口小國柬埔寨和埃及，更相繼宣佈大米出口禁令。
米飯係亞洲人主要糧食，幸好中國的大米出口及進口量都很少，基本自給自足，受國際價格影響較細，然而在供不應求之下，遲早亦要大幅加價。昨日炒起咗隻金源米業（677），呢隻作為本港主要嘅食米入口、批發與加工商，食米存貨即時漲價可以理解，但按例入口商只需維持15日存貨，升值多少則成疑問。
長遠而言，米價升或令市民減少食米，轉向如意粉、麵等食物，所以即使股價咁快反應，但金源未必係真正得益者。幸好溫總都話，會確保港澳食米供應，短期內食米貿易單價上升，對金源應該有着數，故只宜短炒，高追不宜。

全球糧食價格勁升，國內即時出現通脹恐慌，又驚有新一輪宏調，希望內地領導人明白糧食價格勁升因素，靠加息控制貨幣供應係解決唔到嘅，最重要還是靠大力推動農業生產，大幅增加糧食供應量，先至係辦法。
市場似乎亦明白呢個道理，噚日炒起一眾糧食及農業股，中化化肥（297）急升4%、一拖（038）升3.4%、浩倫（1073）同超大（682）都微升。同樣以化肥為主業，海油化學（3983）卻要下跌4.6%，由於其股價不算跑贏中化肥好多，跌得頗為不合理，或可視為趁低吸納機會。